विज्ञान

चमत्कार हा शब्द उच्चारला की, आधुनिक मन जरा दचकतं. त्यामध्ये कुठेतरी दैवी शक्तीचा वास येतो. सूर्यमालेतील सृष्टिचमत्कार मधल्या चमत्काराला मात्र अंधश्रद्धेचा वास येण्याचं कारण नाही. कारण सूर्यमालेतील चमत्कार वैज्ञानिक आहेत. विज्ञानाच्या नियमांनी त्यांचं गूढ उकलता येतं. या अफाट विश्वातील एकमेवाद्वितीय सूर्यमाला हेच मुळी एक महान आश्चर्य आहे. याचं कारण सूर्यमालेतील पृथ्वीचं अस्तित्व आणि पृथ्वीवरील बुद्धिमान मानवाचा संचार. ग्रह-उपग्रहांचं भ्रमण, त्यांचे छोटे-मोठे आकार, त्यांची खास व्यक्तिवैशिष्ट्यं, धूमकेतू आणि लघुग्रह यांची नवलाई आणि अब्जावधी वर्षांपूर्वींच्या घडामोडी... या सर्वांचा एकत्रित परिपाक म्हणजे आपल्या सूर्यमालेतील मंत्रमुग्ध करणारे सृष्टिचमत्कार. कल्पनाही करता येणार नाहीत, अशा मती गुंग करणा-या गोष्टी इथं दररोज घडतात. या भव्य-दिव्य घटनांचा रंजक आलेख म्हणजे सूर्यमालेतील सृष्टिचमत्कार

डॉ. प्रियदर्शिनी कर्वे! एक तरुण शास्त्रज्ञ, प्राध्यापक, प्रयोगशील सामाजिक कार्यकर्ती, अन् पुष्कळ काही. ही आहे महर्षी धोंडो केशव कर्वे यांची पणती. म्हणजेच दिनकर-इरावती या कर्वे दांपत्याच्या जाई निंबकर, गौरी देशपांडे, डॉ. आनंद कर्वे या तीन अपत्यांपैकी डॉ. आनंद कर्वे यांची मुलगी. म्हणजेच इरावतीबाईंच्या परिपूर्ती मधल्या नंदू कर्व्या ची मुलगी. हिनं पर्यावरणा चा वर्ल्ड टेक्नॉलजी नेटवर्क चा आंतरराष्ट्रीय पुरस्कार मिळवलाय. (या आधी वेगवेगळ्या क्षेत्रांत हा पुरस्कार मिळवलेल्या मोजक्या भारतीयांपैकी एक आहेत - हिज एक्सलन्सी डॉ. ए पी जे अब्दुल कलाम! ) ही जिथे प्रकल्प समन्वयक आहे, त्या आरती संस्थेनं अत्यंत प्रतिष्ठेचा जागतिक ॲशडेन पुरस्कार दोन वेळा मिळवला आहे. समाजासाठी धडपडण्याचा वेडा ध्यास हिनं वारसाहक्कानं मिळवला आहे. हिची थक्क करणारी आत्तापर्यंतची वाटचाल अन् क्षमता बघता एकच ओळ मनात येते किनारा तुला पामराला !